Potpourri għar-Ruħ

February 20, 2024

Potpourri għar-Ruħ (Eżerċizzi Spiritwali 2024)

February 3, 2024

DESKRIZZJONI:  Riflessjonijiet interattivi dwar temi varji bħal: il-MAĦFRA, it-TBATIJA, RELAZZJONIJIET, l-ANZJANITA, il-BILANĊI fil-ĦAJJA, il-PRIJORITAJIET, it-TROBBIJA u l-KUXJENZA.

FEJN se JSIRU? 
Kors 1: Ħal-Luqa Knisja Parrokkjali – 19, 20 u 21 ta’ Ftar mis-6.30pm – 7.00pm
Kors 2: Fil-każini tal-Banda l-Gudja: (i) Każin La Stella: it-Tnejn 26 ta’ Frar fis-7.15pm (ii) Każin Maria Assunta l-Erbgħa 28 ta’ Frar fis-7.15pm.
Kors 3: Ħal Safi Knisja Parrokkjali – 4, 5 u 6 ta’ Marzu bejn is-7.00pm sas-7.30pm
Kors 4: Fil-każin tal-Banda San Pawl Ħal Safi – il-Ġimgħa 17 ta’ Frar 2024, fis-7.15pm.
Kors 5: Knisja Madonna Ta’ Loretu l-Gudja – 19 ta’ Marzu bejn id-9.00am u nofsinhar
 


Lejn Identità Sana għall-Każini tal-Baned Tagħna

September 21, 2023

Dun Tony Pace huwa Direttur Spiritwali tas-Soċjetà La Stella tal-Gudja, u tal-Każin Banda San Pawl ta’ Ħal Safi.

(N.B. L-ideat diskussi f’dan l-artiklu huma tal-awtur, u mhux bilfors jirriflettu l-ideat tal-mexxejja tal-knisja u tal-kumitati ċentrali tal-Każin La Stella u tal-Każin San Pawl.)

LEJN IDENTITA SANA GĦALL-KAŻINI TAL-BANED TAGĦNA – Dun Tony Pace

Il-qawl Malti jgħallimna: l-ewwel il-pappa, imbagħad l-impappa! U veru, għax ma jkunx għaqli li wieħed jittraskura x-xogħol, il-job, jew il-familja minħabba l-passatemp u l-volontarjat! Però, fil-kuntest tad-dsatax-il seklu meta missirijietna bdew joħolmu bil-baned, u fil-kuntest tal-21 seklu, dan il-qawl jibqa’ suġġett għal bosta interpretazzjonijiet differenti. Illum il-kundizzjonijiet tax-xogħol tjiebu, tant li għandna iżjed ħin għal passatempi u ħidma volontarja.

Jeremy Boissevain, soċjologu Olandiż li għamel żmien jgħix Ħal Kirkop u n-Naxxar josserva r-relazzjonijiet tal-każini tal-banda mal-parroċċi u mal-komunitajiet, fil-ktieb tiegħu Saints and Fireworks, ippreveda li l-festi Maltin se jmorru lura u addirittura jistgħu anke jispiċċaw. Il-kuntest kien dak tas-sittinijiet u s-sebgħinijiet meta s-soċjetà tagħna kienet issussata waħda sew minn taqlib enormi, taqlib politiku, soċjali u reliġjuż. Kienet l-era post-kolonjali u l-era tal-kwistjonijiet politiku-reliżjużi.

Illum nistgħu ngħidu illi minn dak li ħabbar Boissevain ma seħħ xejn. Il-każini tal-baned u l-festi huma iżjed minn qatt qabel parti integrali mill-ħajja soċjali u mill-kultura tal-komunitajiet tagħna. Fil-proċess jikkontribwixxu mhux ftit biex tissawwar l-identità ta’ kull belt u raħal Malti.

Bħal kull intrapriża, il-każini tal-baned ma tantx jistagħġnaw malajr; huma dinamiċi u allura jew imorru lura, jew ’il quddiem! Id-dmir tagħna huwa li naraw li jmorru ’l quddiem u mhux lura! Nistaqsu: xi jfissru l-każini għalina l-Maltin u l-Għawdxin, illum fl-2023? X’jimmotiva lil tant u tant voluntiera biex jiddedikaw daqshekk ħin u enerġija biex jaraw lill-każin u l-banda tagħhom ġejjin ’il quddiem?

Mhux faċli nirrispondu mistoqsijiet bħal dawn, għaliex mitt bniedem mitt fehma. Nistedinkom taħsbu fuq risposti għal dawn il-mistoqsijiet permezz ta’ metodu sempliċi. L-ewwel ejja naraw X’MHUMIEX il-każini, imbagħad nippruvaw naraw X’INHUMA!

X’MHUMIEX IL-KAŻINI:

  1. Mhumiex għaqdiet reliġjużi bħalma huma pereżempju l-Mużew u l-Azzjoni – imma hemm rabtiet u konnessjonijiet qawwija ħafna bejn il-każin u l-Fidi Kattolika tagħna.
  2. Mhumiex intrapriżi kummerċjali li l-iskop ewlieni tagħhom huwa l-qligħ u l-investiment tal-flus, bħalma huma l-ħwienet u r-ristoranti – imma l-finanzi jibqgħu biċċa uġigħ ta’ ras kbira għal kull kumitat ta’ każin tal-banda.
  3. Mhumiex każini politiċi – f’kull każin hemm lok għal kwalunkwe twemmin politiku li jeżisti fil-Gżejjer Maltin.
  4. Mhumiex skejjel fis-sens tradizzjonali fejn wieħed itejjeb il-ħiliet tiegħu fit-tagħlim akkademiku, f’suġġetti tradizzjonali (Matematika, Malti, Ingliż eċċ.) u f’suġġetti moderni (eż. il-Kompjuter). Però bi dritt, bl-isforzi tagħhom biex it-tfal u ż-żgħażagħ jitgħallmu l-mużika, bosta każini jistgħu liberament jissejħu skejjel tal-mużika!
  5. Mhumiex post tal-pika – kompetizzjoni iva, tista’ tagħmel il-ġid, imma l-pika ġġib biss inkwiet u bil-pika, il-kultura tispiċċa titħaddem mhux bl-imħabba u l-passjoni imma b’enerġija artifiċjali.

X’INHUMA L-KAŻINI?

  1. Huma skejjel tal-mużika – fil-każini tagħna trawmu u ħadmu bosta mużiċisti validi li ħallewlna patrimonju mużikali eċċellenti. Fil-każini mijiet ta’ tfal u żgħażagħ jitgħallmu l-mużika u saħansitra jiġu mislufa strumenti mużikali biex jitħarrġu u jipprattikaw fuqhom.
  2. Huma benniena tal-kultura – bosta, fil-każini jsibu post fejn jistgħu jesprimu u jkabbru t-talenti tagħhom, talenti artistiċi bħalma huma l-pittura u l-iskultura, ħiliet organizzattivi u ħiliet pirotekniċi.
  3. Huma l-familja estiża ta’ bosta membri u partitarji – bosta jikkummentaw kif fil-każin, bħal f’bosta għaqdiet oħra, wieħed isib post fejn jista’ jistrieħ u jgħid kelma ma’ ħbieb li jridulu l-ġid, u hekk tħossok parti minn familja kbira.
  4. Huma awtonomi – jamministraw lilhom infushom b’mod indipendenti mill-knisja, mill-gvern u mill-partiti politiċi. Però għall-grazzja t’Alla teżisti diġà kollaborazzjoni u sinerġija qawwija bejn il-każini u l-entitajiet imsemmija.
  5. Huma postijiet siguri għall-kbar u ż-żgħar – huma post fejn il-ġenituri jibagħtu lil uliedhom biex jitgħallmu l-mużika moħħhom mistrieħ li qegħdin f’ambjent sigur fejn jirrenjaw il-valuri t-tajba u mhux Allaħaresqatt il-vizzji.
  6. Huma xprun tad-demokrazija – l-għażla tal-mexxejja ssir b’mod demokratiku, ħafna drabi b’elezzjonijiet trasparenti.

Ovvjament din il-lista mhijiex kompluta. Hemm ħafna iktar x’wieħed jistaqsi, jirrifletti u jipprova jirrispondi. Inħalli f’idejkom issibu intom x’inhuma u x’mhumiex il-każini tagħna. Ejjew nidentifikaw x’hemm tajjeb fil-każini, biex nikkonservawh, u x’hemm bżonn jinżabar biex il-każini tal-baned tagħna jaslu li jkollhom IDENTITÀ SANA, identità b’saħħitha li tkompli tagħmel ġieħ lill-istess soċjetajiet mużikali.

Dun Tony Pace Ottubru 2023

N.B. L-ideat imsemmija f’dan l-artiklu huma tal-awtur, u mhux bilfors jirriflettu l-ideat tal-mexxejja tal-knisja u tal-kumitat ċentrali tal-Każin La Stella.

Dun Tony Pace huwa d-Direttur Spiritwali tal-Każin Banda La Stella tal-Gudja kif ukoll tal-Każin Banda San Pawl ta’ Ħal Safi.


Il-Kurrikulu l-Moħbi tal-Parroċċa

August 19, 2023

(fil-fuljett tal-Parroċċa Ħal Safi – Festa 2023) Dun Tony Pace

Niftakar darba f’Jum il-Premjazzjoni fi skola sekondarja fejn kont ngħallem, il-Kap tal-Iskola għamlet diskors li għadu impressjonat f’moħħi sal-lum. Quddiem sala tal-iskola mimlija studenti, għalliema, ġenituri, il-ministru tal-edukazzjoni u bosta uffiċjali edukattivi oħra, din il-Headmistress tkellmet dwar il-Kurrikulu l-Moħbi (the hidden curriculum) tal-iskola. “Tridu tkunu tafu kemm hi f’saħħitha l-iskola?” staqsiet il-Headmistress. “Tavżawniex li ġej il-ministru l-iskola, għax probabbli niżbgħu kull m’hawn, innaddfu sew u navżaw lil kulħadd biex iġib ruħu sew waqt iż-żjara!” Il-Headmistress issuġġeriet biex minflok, jiġu l-iskola bil-kwiet, mingħajr avviż, u jinnutaw l-istudenti kif iġibu ruħhom meta jmorru t-tojlit, fil-grawnd waqt il-brejk, kif jimxu minn klassi għall-oħra meta tinbidel il-lezzjioni, kif jitkellmu mal-għalliema u mal-istudenti sħabhom fil-kurituri! Dan jgħidulu l-kurrikulu l-moħbi tal-iskola. Huwa indikatur importantissmu meta niġu biex inkejlu s-saħħa vera tal-iskola!

Nistaqsi, hemm xi mod kif nistgħu nkejlu s-saħħa tal-parroċċa tagħna ta’ Ħal Safi? Huwa eżerċizzju diffiċli, imma nistieden lil kull min għandu għal qalbu l-ġid spiritwali tal-komunità tagħna biex jagħmel dan l-eżerċizzju, billi juża l-metodu tal-Kurrikulu l-Moħbi!

Ejja qabel xejn ma ninjorawx il-Kurrikulu Formali tal-Parroċċa. Meta tagħti ħarsa ħafifa tara ħafna ħajja u saħħa fil-parroċċa tagħna. Biex nieħu ftit eżempji, kellna ċelebrazzjonijiet liturġiċi mill-isbaħ u b’attendenza tajba fil-Milied u fil-festi tal-Għid. Kellna festi kemm liturġiċi kif ukoll fuq barra, f’Awwissu 2022 u 25 ta’ Jannar 2023 organizzati mill-aħjar bis-sehem ta’ voluntiera ġenerużi u mimlija enerġija u mħabba għall-knisja u għar-raħal. It-tagħlim tad-Duttrina jsir b’mod regolari u b’dedikazzjoni. Fi Frar kellna Assemblea Parrokkjali fejn spikka sehem tassew qawwi minn bosta parruċċani ġejjin minn kull qasam tal-komunità. Għall-grazzja t’Alla wara l-Covid l-attentenza għall-quddies qiegħda dejjem tiżdied. Grupp relattivament ġdid fil-parroċċa tagħna, in-9AM qiegħed jagħti ħajja u kulur lil diversi ċelebrazzjonijiet, l-iktar, imma mhux biss il-quddiesa tal-Ħadd tad-9a.m., biex il-quddiesa qiegħda tkun waħda parteċipattiva u ħajja. Dawn u bosta inizjattivi oħra għandhom jimlewna bil-kuraġġ.

Imma, biex ikollna komunità spiritwalment f’saħħitha, irridu neżaminaw ukoll il-Kurrikulu l-Moħbi, dak li ma tantx jidher. Dan il-Kurrikulu l-Moħbi jiffoka fuq l-imġiba tagħna fid-djar u l-familji, fuq il-postijiet tax-xogħol, fit-toroq, fil-ħwienet u l-każini tagħna, fil-postijiet tad-divertiment, fil-klassijiet tal-iskola. F’dawn il-postijiet kollha, mhuwiex is-saċerdot li jorganizza u jmexxi, imma il-kontroll assolut qiegħed għand kull wieħed u waħda minna.

Nistedinkom għalhekk tagħmlu dan l-eżami ħafif tal-kuxjenza u tieħdu nota tar-risposti tagħkom f’qalbkom.

  • Lit-tfal u liż-żgħażagħ tagħna, qegħdin niggwidawhom u fejn hemm bżonn nikkoreġuhom, bl-imħabba u bil-kortesija?
  • Il-familjari li jieħdu ħsieb l-anzjani tagħna, qed jagħmlu dan b’biżżejjed paċenzja u imħabba, biex l-anzjani ma jħossuhomx piż fuq l-ulied?
  • Aħna xejn pronti li niġġudikaw u nikkundannaw?
  • Il-persuni ta’ nazzjonalità barranija, li hawn jgħixu fostna, qegħdin narawhom bħala riżorsa, jew theddida? Inħarsu lejhom mil-lenti tal-opra tal-ħniena ‘Ilqa’ lill-frustier’?
  • Uliedna kif qed jikkomunikaw magħna l-kbar u bejniethom, b’modi virtwali, bil-mowbajls biss, jew b’komunikazzjoni reali wkoll?
  • Madwar l-inħawi kollha tar-raħal, għadna nisimgħu dagħa b’Alla, bil-Madonna u l-qaddisin?
  • Lill-mexxejja tagħna, kemm reliġjużi kif ukoll ċivili, nittrattawhom bir-rispett? Lesti li nagħtuhom feedback ġenwin ras imb’ras jew inkunu pronti infajru u nweġġgħu bl-addoċċ fuq il-Facebook?
  • Meta uliedna jiġu d-dar u jgħidulna li l-għalliema ikkoreġiet xi imġiba tagħhom, neħduha kontra l-għalliema jew inwissu lit-tfal?
  • Matul il-ġimgħa nsibu ħin għal xi viżta fil-Kappella tal-Adorazzjoni, għall-quddiesa, jew talb ieħor?
  • Qegħdin naħdmu biex minn ġewwa raħalna noħolqu ambjent fertili fejn il-vokazzjonijiet saċerdotali, reliġjużi, lajċi impenjati, u ta’ żwieġ nisrani jistgħu jiffjorixxu?
  • Fil-politika qegħdin niddjalogaw bejnietna jew għadna tribali, ‘aħna’ u ‘huma’?
  • Meta xi ħadd jonqosna, insibuha xejn bi tqila biex naħfru u ninsew, jew pjuttost inżommu s-sentimenti negattivi f’qalbna?
  • Qegħdin nersqu iktar spiss lejn is-sagramenti, jew huwa veru illi l-qrar qiegħed jonqos u t-tqarbin jiżdied?
  • Is-servizzi li nagħtu fil-knisja, fl-għaqdiet, fil-każini, fil-banda, fil-Mużew, fil-Kor, qegħdin nagħtuhom b’intenzjoni retta, għall-glorja t’Alla, jew nieħdu għalina mal-inqas osservazzjoni li jagħmlulna?

Hemm iktar x’wieħed jeżamina, imma dan inħallih għal kull wieħed u waħda minnkom. Għall-festa ipprova sib imqar aspett wieħed tal-Kurrikulu l-Moħbi u aħdem fuqu matul ix-xhur li ġejjin. B’hekk, il-festa tkun ħalliet il-ġid spiritwali, li huwa tant mixtieq!

Fr Tony Pace

Lulju 2023


L-Epistolarju

August 19, 2023

Dun Tony Pace – DIRETTUR SPIRITWALI tal-Każin San Pawl Ħal Safi

Jiena trabbejt f’parroċċa fejn tingħata qima kbira lil Ommna Marija Santissma. Fil-fatt f’raħal twelidi, il-Gudja isiru mhux inqas minn tliet festi lill-Madonna taħt tliet titli differenti – Tar-Rużarju, Taċ-Ċintura u Santa Marija. Dan ma jfissirx li dwar San Pawl, l-Appostlu tal-Ġnus, qatt ma smajt xejn. Altru! Fil-MUSEUM ta’ San Ġorġ Preca, is-Superjuri tagħna dejjem taw importanza kbira lill-hekk imsejjaħ EPISTOLARJU.

Fl-Epistolarju San Ġorġ Preca ġabar bosta sentenzi mill-Ittri tal-Appostli, bl-iskop li dawn iservu bħala gwida għall-ħajja spiritwali tagħna. Ngħid id-dritt, ħafna minnhom bqajt niftakarhom sal-lum.

Ovvjament fl-Epistolarju Mużewmin jispikkaw ħafna siltiet u sentenzi mill-ittri li San Pawl kiteb lill-ewwel komunitajiet Insara li waqqaf huwa stess madwar ix-xtut tal-Baħar Mediterran. Pawlu kien pijunier fit-tixrid tal-Bxara t-Tajba ta’ Kristu lill-ġnus. Fil-fatt huwa magħruf bħala l-Appostlu tal-Ġnus.

Però Pawlu ma kienx minn dejjem daqshekk ħerqan għall-Fidi Kristjana. Kien jismu Sawlu. Sawl ħadem qatigħ biex ifixkel u jekk possibbli jeqred it-twemmin Nisrani. Sawlu ippersegwita kemm felaħ lill-ewlenin Insara.

Ġara mbagħad, li bil-miraklu tad-dawl qawwi li għamieh għal ftit jiem, fit-triq lejn Damasku, u bl-intervent ta’ raġel qaddis jismu Ħananija, Sawlu nduna li kien fl-iżball għax Kristu ma riedx jeqred il-Liġi ta’ Mose imma ried biss iwassalha għall-perfezzjoni. Hawnhekk Sawlu, minn persekutur sar difensur tat-tagħlim ta’ Kristu u tas-segwaċi tiegħu. B’enerġija u ħeġġa tremenda imbarka fuq l-Evanġelizzazzjoni. Xi komunitajiet Insara li nibtu u iffjorixxew madwar ix-xtut tal-Baħar Mediterran f’dawn iż-żminijiet kienu dawk Rumani, il-Korintin, il-Galatin, l-Efesin, il-Filippin, il-Kolossin, il-Lhud u it-Tessalonkin. San Pawl kiteb ukoll ittri mimlija pariri siewja għall-qdusija lil Timotju, Titu u Filemon.

Nistaqsu, għaliex San Pawl kiteb dawn l-ittri kollha? Ir-risposta hija waħda sempliċi. Il-komunitajiet Insara li twaqqfu fl-ewwel żminijiet tal-knisja, nistgħu nsejħulhom Insara li kienu jgħixu f’dinja u ambjent pjuttost pagan. Għalhekk San Pawl kien jipprova jagħmlilhom kuraġġ bl-eżortazzjonijiet tiegħu fl-ittri li kien jiktbilhom.

Is-Superjuri u l-Prefetti tal-MUSEUM, fil-klassijiet tal-Preparatorju, il-Magħżulin, l-Aspiranti u l-Kandidati kienu jħajruna nitgħallmu bl-amment dawn is-sentenzi mill-Ittri tal-Appostli. L-aħħar ħames minuti ta’ kull lezzjoni mbagħad konna kollha ngħidu xi sentenza bl-amment bħala għeluq tal-lezzjoni. Normalment kull sentenza konna nibdewha hekk: San Pawl jikteb, u nkomplu ngħidu s-sentenza li nkunu tgħallimna bl-amment.

It-temi ittrattati fl-Epistolarju kienu varji għall-aħħar. Nieħdu xi eżempji.

Il-ĦIDMA u x-XOGĦOL: Intom tiftakru, ħuti, fit-taħbit tagħna u fit-tbatija: lejl u nhar ħdimna, biex ma nkunu ta’ tagħbija għal ħadd minnkom, waqt li xandarnielkom l-Evanġelju ta’ Alla. 1 Tessalonkin 2, 9.

Il-ĠID: U intom ħuti, agħmlu l-ġid bla ma tegħjew. 2 Tesalonkin 3, 13

Id-DNUB: Għax Alla ma sejħilniex għaż-żina, għad-diżonestà jew l-impurità, imma għall-qdusija. 1 Tessalonkin 4, 7-8.

L-GĦAŻŻ: Meta konna fostkom aħna ordnajnielkom li jekk xi ħadd ma jridx jaħdem, dan anqas ma għandu jiekol. Issa aħna smajna li hemm xi wħud fostkom li qegħdin jitgħażżnu; mhumiex jaħdmu, imma qed jinħlew fix-xejn.. Lil dawn in-nies nordnawlhom u nwissuhom, f’isem il-Mulej Ġesù Kristu, biex jaħdmu sewwa u għajxienhom jaqilgħuh. 2 Tessalonkin 3, 10-12

ALLA L-IMBIEREK: (i) Għalhekk inħeġġek biex iżżomm ħajja l-grazzja ta’ Alla li għandek fik bit-tqegħid ta’ idejja. Għax Alla ma taniex ruħ ta’ biża’ imma ruħ ta’ qawwa, ta’ mħabba u ta’ rażna. 2 Timotju 1, 6-7.

(ii) Niżżi ħajr lil Alla tiegħi dejjem u niftakar fik fit-talb tiegħi, għax nisma’ fuq l-imħabba tiegħek u l-fidi li għandek għal Sidna Ġesu u mal qaddisin kollha. Filemon 1, 4-5.

IL-FERĦ: Għax min hu t-tama tagħna, il-ferħ tagħna, il-kuruna tal-foħrija tagħna? Mhux intom quddiem Sidna Ġesu f’jum il-miġja tiegħu? Iva, intom il-glorja tagħna u l-ferħ tagħna. 1 Tessalonkin 2, 19-20.

IL-FIDI: Żomm bħala mera l-kliem sħiħ li smajt minn għandi fil-fidi u l-imħabba li huma fi Kristu Ġesu. Ħares it-tagħlim sabiħ mogħti lilek bil-għajnuna ta’ Ruħ il-Qodos li jgħammar fina. 2 Timotju 1, 13-14.

IL-PREMJU TAL-ĠENNA: (i) Għax aħna nafu li jekk it-tinda tal-għamara tagħna fl-art tiġġarraf, għandna dar oħra, xogħol ta’ Alla, għamara mhix maħduma minn id il-bniedem, li ddum għal dejjem fis-sema. 2 Korintin 5, 1.

(ii) Għalhekk aħna qalbna qawwija u persważi li aħjar noħorġu minn dal-ġisem biex immorru ngħammru għand il-Mulej! 2 Korintin 5, 8.

Flimkien mal-Epistolarju, fil-MUSEUM kellna wkoll il-Leħen il-Maħbub. Dawn kienu sentenzi meħuda mit-tagħlim ta’ Sidna Ġesu Kristu. L-Epistolarju u l-Leħen il-Maħbub jibqgħu wirt pedagoġiku importanti fejn tidħol l-edukazzjoni Nisranija tat-tfal u ż-żgħażagħ tagħna. Huma għodda importanti fil-mixja tagħna fl-ispiritwalità. Huma mezz importanti biex noqorbu lejn Kristu.

Dun Tony Pace

Lulju 2023


Mhux l-istess imma simili!

July 28, 2023

F’Jum il-Missier 18.06.2023

June 20, 2023

L-40 anniversarju tal-Kor SINE MACULA ta’ Ħal Safi

May 15, 2023

Fid-29 ta’ Mejju 1983, 40 sena ilu, il-Kor Sine Macula ta’ Ħal Safi kanta għall-ewwel darba fil-pubbliku. Dan il-feature jagħti ħarsa ħafifa lejn l-ewwel tliet deċenji tal-Kor. Fl-aħħar 10 snin il-Kor għadda minn tibdiliet kbar. L-ikbar bidla kienet fid-direzzjoni tal-Kor fejn fl-2016 il-Kor beda jitmexxa minn Mro Alexandra Borg. Meta wieħed iqis kif fl-aħħar 10 snin il-Kor saħħaħ ferm is-sehem tiegħu fil-liturġija, ħa sehem f’diversi kunċerti, kemm ġewwa Ħal Safi kif ukoll f’bosta rħula u bliet oħra, ta żewġ kunċerti barra minn xtutna wieħed Wales u l-ieħor fit-Toscana, il-futur tal-Kor jidher li huwa sabiħ.

It-Tnejn 29 ta’ Mejju li ġej (2023) se ssir quddiesa ta’ radd il-ħajr fil-Knisja Parrokkjali ta’ Ħal Safi. Il-quddiesa tibda fis-6.30pm. Ex-koristi, qraba, ħbieb ……. NARAWKOM. AD MULTOS ANNOS SINE MACULA!


Tfuliti u Żogħżiti ġewwa l-Gudja

August 18, 2022

Artiklu fil-ktejjeb tal-festa maħruġ mis-Soċjeta Filarmonika La Stella tal-Gudja (<>)


L-Oratorio Dun Ġorġ Preca

May 9, 2022

Librett ta’ Paul Callus, mużika ta’ Tony Pace

  1. Introduzzjoni (isma’ <><><>)
  2. Narrazzjoni (isma’ <><><>)
  3. Ġorġ Seminarista (isma’ <><><>)
  4. Dun Alwiġ (isma’ <><><>)
  5. Ġenju Borġ l-ewwel superjur ġenerali (isma’ <><><>)
  6. Żgħażagħ (isma’ <><><>)
  7. Dun Ġorġ jibda l-MUSEUM (isma’ <><><>)
  8. Ġannina Cutajra l-ewwel superjura ġenerali (isma’ <><><>)
  9. Narrazzjoni (isma’ <><><>)
  10. 11, 12, 13 L-ewwel soċji (isma’ <><><>)
  11. (14) Dun Ġorġ jibda l-MUSEUM (isma’ <><><>)
  12. (15) Narrazzjoni (isma’ <><><>)
  13. (16) Dun Ġorġ Fundatur (isma’ <><><>)
  14. (17) Epilogu (isma’ <><><>)

Create your own website, free on WordPress.com.Create your own website.
Start free